يالله ياللـي نبتهـل لــك ونخـشـاك = ياخـالـق الدنـيـا ورافــع سمـاهـا
ياواحـد(ن) ماهـي بتحصـى عطايـاك = الخلق كـل الخلـق محـد(ن) حصاهـا
الجود من جـودك وعطفـك وحسانـك = يامستجيـب الداعيـه فــي دعـاهـا
انـت الكريـم اللـي نخافـك ونـدراك = لـولاك نفـسـي ماتحـقـق منـاهـا
انـك تثبتنـي علـى غايـة أرضــاك = عبـدك ولا غيـرك حيـاتـي ولاهــا
سجدت لـك يادايـر(ن) كـل الافـلاك = ياغـايـة الـشـكـوى ويامنتـهـاهـا
لـولاك يـارب السـمـاوات لــولاك = ماتقبـل التوبـه علـى مــن نـواهـا
يا العبـد مالـك غيـر ربـك ومـولاك = كـل البشـر تفنـي ويمحـي ذراهــا
هو اللـذي صـورك سـواك وانشـاك = اعجـاز ماوصـل البشـر مستـواهـا
لا تشمـت العالـم وتنسـى خطـايـاك = احكم هـوا نفسـك وحاسـب خطاهـا
حاسب ضميـرك قبـل تدفـع خطـاك = كم مـن قـدم قلـب المشقـي حفاهـا
عليـك بالاحسـان والـرب يحـمـاك = مـن قـدم الحسنـات يلقـى جـزاهـا
شيطـان نفسـك لايـغـرك ويـغـواك = قبلـك غـوا نـاس(ن) وكـدر صفاهـا
من زمرة الطاغـوت حـذراك حـذراك = لا تبتلـي بجـروح يصعـب دواهــا
وإلى مشيت اعرف دروبـك وممشـاك = احرص على نفسـك وخالـف هواهـا
أمّـارة(ن) بالسـوء مـا هـي بتنهـاك = اقبـض عليهـا ليـن يجلـى صـداهـا
اقطـع نوايـاهـا بديـنـك وتـقـواك = هلّـل وعنـد الله سريـع(ن) شفـاهـا
والعيـن لا تنظـر بهـا مـن تـعـدّاك = المحصنـه لـو تلتفـت لـك وراهــا
اصبـر علـى همّـك وغمّـك وبلـواك = عـف وتعفـف لا يـغـرّك حـلاهـا
واترك حرام القوت مـا هـو بيمـلاك = كـل البطـون الجايعـه مـا مـلاهـا
رشفة حلال اتسـد جوعـك ومضمـاك = تسـوى مشاريـب الحـرام وغثـاهـا
النـار فـي جوفـك وتصلـى حنايـاك = نـار الجحيـم تزيـد لـلـي وطـاهـا
واحفـظ لسانـك لا يجـرك ويـبـلاك = اخـذ الثميـنـه لـوغـلا مشتـراهـا
الهـرج ميزانـك ويكشـف خفـايـاك = كلـمـة تعيـبـك لا تبـيّـن نـبـاهـا
صون الكلام وصـون نفسـك ومبـداك = للنفـس حشمـة لا تفـصّـم عـراهـا
اصمت مدامك عارف(ن) سير مجـراك = لا تنقـل النّـمـة وتبـحـث خفـاهـا
يـزول قـدرك عنـد أقـرب دنـايـاك = لـو هـو ولدعمّـك حياتـك جفـاهـا
وحلـم تـراه الحلـم يرفـع مـزايـاك = هـو سيـد الاخـلاق هــو مبتـداهـا
والصعـب المبعـوث ماهـوب يخفـاك = شفيعـنـا يــوم المـلاقـاه طـاهــا
خل الجهـل لاتجعـل الغيـض ياطـاك = تـرى الجهـل سـم القلـوب وعماهـا
وإلى ابتليـت ارفـع إلـى الله شكـواك = لا بدّهـا الأيــام تكـشـف غطـاهـا
اصبر يزيـن الحـظ ويزيـن مرمـاك = الله يفـرجـهـا ويـدفــع بـلاهــا
لا تمنـع المحـروم لا مـن تنـصّـاك = الناس لأجـل النـاس وأحسـن عطاهـا
ابــذل لـوجـه الله والله يـجــزاك = مثـل الغـروس أتطيـب للـي سقاهـا
لا ضاع معروفـك ولا ضـاع حسنـاك = إن كـانـهـا لله تـلـقـى جـزاهــا
جارك ولو هو جار تسقيـه مـن مـاك = عليـه لا تـرفـع يديـنـك عصـاهـا
أحسن جوار الجـار لـو كـان يشنـاك = ترى العرب تحشـم كـلاب اقصراهـا
بكـره يـشـد ويكـتـب الله فـرقـاك = عسـاه يـذكـر جيـرتـك مانسـاهـا
الظلـم شيـن ويجعـل النـار مثـواك = راع الظليمـه عيشتـه مــا هنـاهـا
فوقـك إلـه العـرش عالـم نـوايـاك = ينظـر قلـوب النـاس وش محتـواهـا
يسمـع بمـا تجهـر وعـارف خفايـاك = بأمره شروق الشمـس ترسـل ضياهـا
هـو عالـم الغيـب ورتـب خـلايـاك = وهو خالق(ن) فيـك العـروق ورواهـا
والضيف له حق(ن) إلى حـل بحمـاك = قلّـط ضيـوف الله وأكــرم لحـاهـا
لا تحقـر الضيفـان وتشـح بغـضـاك = مـن ماعـطـاك الله قـلـط عشـاهـا
وعليـك باللـي حـزة الضيـق يفـداك = لا شـانـت الدنـيـا ودارت رحـاهـا
لا من زهمته لو علـى المـوت لبّـاك = عينـي لجـل عينـك وروحـي فداهـا
ترا الخوي نبـراس روحـك وملجـاك = لاكحـلـة بـقـعـا وزادة غـثـاهـا
حذراك من بعـض المخاليـق حـذراك = بعـض العـرب مـا تفرقـه مننساهـا
تايـه وضايـع بـيـن ذولا .. وذولاك = فيـه الجهالـة واصــل(ن) منتهـاهـا
موضوع: يالله ياللي نبتهل... 
الثلاثاء أكتوبر 02, 2012 7:31 pm
