الله مـن حـبٍ تكنـه ضلـوعـي
حتـى تـوزع فالشراييـن توزيـع
عليك يـا زاهـي ثـلاث الردوعـي
أعوي عوا ذيب ٍ وقفله علـى ريـع
ذيب ٍ يجر الصوت من عقب جوعـي
وياخذ مع البيـدا هذيـب ومذاويـع
جايع ولا حوله من النـزل دوعـي
ويجر له صوت ٍ يشيـب المراضيـع
وعليك من بين الحواجـب دموعـي
هجّـال وسمـيٍ امزونـه مصاليـع
قطعـت فيّـه يالغـزال القطوعـي
أشريك وأنت تبيعني بأرخص البيـع
وعذبت قلبي يا حسيـن الطبوعـي
وحبك شربته مع نسيـم الذعاذيـع
ما ارخي لهرج الناس دونك سموعي
لو عذّلوني عنك لااسمع ولا اطيـع
ليا غاب عنّـي ليلـة ٍ بالسبوعـي
كنّه تمـزّع بشـرة القلـب تمزيـع
ما عاد أفـرّق سبتهـا والربوعـي
يصيبني سجّه عن الـدرب وأضيـع
خشف ٍ معي ياللهوا طـار شوعـي
وخلاّ لذيـذ النـوم عنـدي تقاطيـع
إليـا ذكرتـه والخلايـق هجوعـي
أفـز فـزّة غافـيٍ عقـب ترويـع
للبيض نوع ولشقر الـراس نوعـي
زين الوصوف وكامـلات التطابيـع
من جفّـل الغـزلان فيهـا ربوعـي
وفيها وصوف من الحرار المواقيـع
لا هو متيـن ولا قصيـر الدروعـي
ولا هي من الحدب الطوال النعانيـع
ولا هو نحيف ولا بمشيـه يتوعـي
عليه وصـف مجـدّلات المصاريـع
يابن جري قلبي معه صـار طوعـي
وشرّع له أبواب الهوا الخمس تشريع
واحد منه قلبـي تقـول مخلوعـي
كنّه ينشعنـي مـن الخمـر تنشيـع
وثاني بقى نومي على راس كوعـي
أفتـح مشاريـع ٍ وأقفـل مشاريـع
في غبة ٍ تغـرق طويـل البتوعـي
يصعب على من طب فيها المطاليـع
وثالث بديت وعنه صعب ٍ رجوعـي
يابن جري تصعب علـيّ المراجيـع
ورابع بقى وقتي نـزول وطلوعـي
يضرب بي الهاجس وساع المخاويع
وخامس ملك ما يملكنّـه ضلوعـي
لا هوب لا سلفه ولا هـوب توديـع
ولا هوب غصب ولا رضايه وطوعي
الحـب قسمـه والمناهـج تناويـع
هذا الخبـر والله عليـه السنوعـي
وأبغى الحلول من الرجـال البواتيـع
اللي على الصعبات مثـل الدروعـي
رحامة ٍ وقـت القطاعـة قواطيـع
اللـي مواقفهـم سـواة الرجوعـي
مودع هشيم القاع خضـر ٍ مهانيـع
وأخص فيها اللي له العسر طوعـي
غازي له العسرات دايـم مطاويـع
رفيقي اللـي فـيّ دايـم جزوعـي
ياجب لي أشرحله جميع المواضيـع
عسـاه يلقـا حـل بأيـات نوعـي
وألاّ يقنعنـي عـن الحـب تقنـيـع
موضوع: وعليك من بين الحواجـب دموعـي 
الإثنين سبتمبر 06, 2010 6:38 am
