سوآلف الحريم!!

صبآحكم او مسآئكم ورد
قصص سوالف الحريم ؟؟؟؟
لحد يقول وشن الحريم عاد ؟
الحريم نص المجتمع ( مدري وش معناها بس دايم يقولونها تسذا ) نعم الحريم نص المجتمع !!خخخخخخخخخخخخخ
الحرمة او زي ما يدلعونهن البنات هن شريحة من المجتمع ( على بالي شريحة جوال ) وتخبرون مالنا غنى عنهن الحرمة هي اختك امك جدتك عمتك وشغالتكم ...اية شغالتكم وش فيك تطالع انت وياة ؟ تراهن بشر زينا ..ذا موضوع ثاني نحتسي عنة بعدين خلونا في في الحريم وعالم الحريم وسواليف الحريم للي ما يعرف شي عن الحريم انصحة يمدد سيقانة على ذا الموضوع لانة راح يستفيد منة ( قصدك راح يروح وطي ) .
الحريم وما ادراك ما الحريم
لولا الحريم بعد الله ما وجد الجريش !! والقرصان !!!
لولا الحريم بعد الله ما ارتسمت الابتسامة على براطمك انت وياة مع انة في اغلب الاحيان يكونن سبب في انك تروح في ابو زعبل !!
تصدقون ان كل ما طالعت بكت الدخان وقريت التحذيرات اللي علية ومنها يسبب سرطان وتسدد مدري تخثر شرايين القلب وغيرة وغيرة قلت في نفسي حشى انا ماسكن بكت دخان في يدي والا بنت على غفلة لان ها البلاوي ما تجي من الدخان الا والله ما يسبب ذا الباوي كلها الا الحريم !! واكبر شاهد على حتسي شف اي شاب مقبل وفي رواية يدربي راسة على زواج تلقاة وش زينة نشاط وصحة وصدرة مقاسة اكس لارج وتعال شفة بعد سنتين بس ..سنتين يا مسلم تلقاة من عيادة الى عيادة وحبوب الضغط في جيبة والوجة مسود ونفسة مرتزة على راس خشمة لو تقول لة مسيك بالخير قال لك ضف وجهك تراة مقفلة وربي يحبة اذا ما صار يراجع في مصحة نفسية وكل ذا من وش ؟؟ الحريم الله يكفيكم الشر !!
بس علشان نكون منصفين فية حريم يخلن حياتك بعد العرس جنة ان الله وفق وبارك لك ( خفت منهن قلت خل احسن الصورة والا ترا ذا النوعية الاخيرة ما تلقاها دايم هي حبة وحدة تجي في كل كرتون عاد انت وحظك والله من زين الحظ كني اشوف انت وياة )
قال الشاعر منذو مبطي :
ما كولو ما يلمعو ذهبون
وهذا البيت يدل على صحة كلامي اللي فوق ( للاخوة اللي يقرون شعر وحكم وامثال لا تشرهون علي ترا ما حفظت الا ذا البيت ودايم اكشخ فية اذا بغيت اتفلسف )
لاحد يخش يدربي دبيجتة ويقول انت قاعد تسب في بناتنا وترا فية ناس تقرا من برا السعودية !!
لا وكلا وحشى وفلا بعد !! انا بعرس على سعودية بعد اذا هي وافقت يعني وما ظنتي انها بتشوفني وتوافق الا اذا كانت عمياء
ما نيب قايل الا الصدز وبس الصدز مما رأيت وشاهدت وسمعت خلال مشواري الفني !!
نبدأ باول مشهد :
اذا شفت لك بنت تقول سبحان الله بس هذي ما تعرف شي ابد !! وشلون تبي تصرف عمرها في ها الدنيا !! مرة بريئة ( هين بس ) مرة طيبة ( حبة في كل كرتون بس ) !! مرة مبتسمة ( بس اذا كان لها مصلحة ) تقول لنفسك هذي ما تهش ولا تنش
( وهي اعوذ بالله تكفخ وتطق احيانً )
والله يا حنا مخفات كرجاجيل الا من رحم ربك والا الباقين لين اللحين مصدقين ان الحريم مساكين !! ضعيفات !! وهن اللي يتعبن في حياتهن !! ولاتهون اصطوانتهن المكررة " انا شايلة لك البيت غسيل وطبخ وملاحق بزارينك وغيرة وغيرة " انا ادفع نص عمري واعرف وش معنى وغيرة غيرة ؟ هذا هو شغلس بس الا لازم يسون انفسهن يتعبن !! ولا تهون الاسئلة البريئة اللي تجيك من وقت لوقت يعنيني ما يدرن عن شي ابد !! !! وبعض الرجال يحسب الحريم همهن مكياج وتصبيغ !! وموضات وغيرة .
لكل اللي يظنون تسذا با الحريم اقول لهم كيف الحال بس !! لعنبو بليسكم صحصحو باتسر تبي تعرسون يعني لازم تبدون من اللحين تعرفون وش عندهن والا بتصيرون دجاج مربص في طاسة وياكثرهم اليوم !! وحرمتك تبي تلعب فيك لعب مهوب صاحي ان ترقصك على وحدة ونص وتخليك تشوف نجوم الليل في عز الظهر!!
اما اللي معرس وما يدري لين اللحين عن شي
( وياكثرهم ) ما اقول الا الله يستر عليكم ترا القلب داعي لكم انتم السابقون ونحن الاحقون تصبرو وكل شي بأجرة ( حشى رايحين يجاهدون ذولا ما كنهم بس اعرسو !!)

نشوف الحريم وعالمهن :
البنت من يجي عمرها 17 وما اعرست او على الاقل انخطبت تبدا تعيش في حيرة ! ليش محد خطبني ؟ وش ناقصني عن غيري من البنات ؟ وتبدا امها تاخذها معها في كل مناسبة وعرس علشان تستعرض فيها عن الحريم كود احد منهن تخطبها لولدها !! واذا زاروهن حريم وحطو لهن كيك مصلحتة الشغالة او الام وجلست الام وبنتها مع الحريم تبدا الام با النصب على الحريم اللي عندها !! ترا اللي مصلحة ذا الكيك بنتي !! يا عليها طبخ واكلات ما شاالله عليها بس وهي حتى الاندومي ما يزبط معها! وتبدا عاد البنت عند صديقاتها تنصب وتبكش عليهن امس اتصلت وحدة تبي تخطبني لولدها وعييت و قبل قبل امس صارت مطاقة عند باب بيتنا جو اثنين شباب يبون يخطبوني في وقت واحد وتطاقو علي وفي الاخير عييت عليهم كلهم وقبل اسبوع زارونا جيرانا يبوني لولدهم وخذ من ها الحسي تدرون ليش تنصب ؟
ما تبي تصير اقل من غيرها لانها عارفة هي ومتاكدة ان كل البنات بعد ينصبن عليها لما يقولن لها اننا انخطبنا ورفظنا نبي ندرس خخخخخخخخ وهذا شي عادي يقابلة عند الشباب قولة الواحد من ها اللي يسبحون بنشى واذا شفتة شاقص ما يتحرك استغربت بس اذا عرف السبب بطل العجب والسبب "" علشان ما تخرب الشخصية "" اقول مالت وش كنت اقول اية يقابلة عند الشباب قول فلان " والله امس وانا بسيارتي عند الاشارة وحدة مبرقعة خطر ما تاكلني بعيونها شباب شكلها راحت وطي معي بس انا عطيتها اشكل وما رقمتها "
----------------
وهذي بعد اسمع :
اول ما تنخطب البنت وتتملك وش يصير فيها ؟
تتغير با الحيل تبدا تحسي زي حتسي الحريم المتزوجات !! ويا شين اذا جتك بنت دلوعة خكرية وقالت حتسوة شعبية ياهي تطلع ماصلة من قلب بس هي الا ابي اصير زي الحريم !! وتصير تحاول تتعلم عن طريق امها تقعد تسمعها وش تقول اذا احد عزمها او حبت تعزم غير عاد ان كان البنت ظفرة دخلت المطبخ تبغبس فية لين تتعلم تطبخ !! وتصرفاتها وسلوكياتها ( قوية سلوكياتها صح منيب عاقل ماردونا على غفلة !) تتغير شوي هي ما تبي بس يعنني خلاص تراني كبرت وبصير ربة منزل وهذا يبان من كلامها مع صديقاتها تخبرون لابد يكون بين البنات حتسي خاص ايام العزوبية لانهن ما ارتبطن سواء من الكلام عن فلان الوسيم او علان الغني لكن بعد ما تملكت البنت تحط حدود لصديقاتها في ذا الحتسي !! قالت ايش انا على ذمة رجال خلاص ارجوكم غيرو الموضوع !!
-----------------
بحتسي عن الحمل اللحين بس عندي ملاحظة قاهرتني
اللحين اذا حملت بنت ليش توزي عن الناس انها حامل ؟ صدز شي غريب يا بشر ؟ تلقا فلانة تسالها انتي حامل ؟ تقو عاد هي لها لا هووو لا والله !! وبعد شهر تنتفخ الكرشة !! يعني خايفة من العين ؟ انا اعرف وحدة من قريباتي حملت وولدت وما دراعنها احد حتى اهلها من زود الحرص ما درو اهلها الا وهي داخلة عليهم با البيبي ( اقول يا شين كلمة بيبي في حلقي ماصخة من جد ) كل شي عندنا يوزوز و محد يدري عنة طيب ليش ؟
----------------
البنت اذا حملت وولدت وراحت عند اهلها في النفاس تدري اخي المتزوج وش يصير هناك ؟ ادري الجواب لا تلقاك ما صدقت خبر انها راحت وتستقعد عاد للسهر مع ربعك وطقة البلوت ولي المعسل اللي يا اما رايح او جاي عليكم
تعال شف خذ شوي من اللي يصير :
اهلها طبعاُ واخص امها تبي تحط لها ذاك السرير اللي وش زينة في مجلس الحريم ومعة سرير للبيبي واحيانن يحطونة في المقلط !! وفي الصالة يحطون لها مطرحة !! تخبر الصالة فيها مكيف صحرواي يا الله براد الجنة بس وسرير البيبي اللي جنب مطرحة امة اللي في الصالة بيصير بقدرة قادر حافظ خبز فوقها سجادة او شيلة !! والسبب يبون ذاك السرير الكشخة يستخدم بس اذا جوهم زوار وفي الاساس النفاسية كل وقتها منسدحة في الصالة على المطرحة الناس معد هم مثل اول مسايير وروحات وجيات العالم انشغلت بايش عاد مدري !! وتلقا المجلس اللي فية السرير الكشخة قافلتة امها عن البزارين ولو تخاف يوصخونة وعاد حنا عندنا بزارين مدري وش يبون بس !! ازين وقت في عمر الانسان يقولون طفولتة وحنا من يجينا بزر نقول اف متى يكبر ويفكنا لان مبزرتنا يا ربي لك الحمد شعورهم عرادة ....خشومهم تقطر 24 في اليوم.. انواع الفضايح والفشايل اذا زارك احد واقرب مثال اذا حطيت صينية حلاو وحتى لو هو حلاو بقر قامو يخترشون عليها تقل ما قد شافو نعمة اللي يعبي مخابية واللي يبي ياخذ الصينية كلها و مبزرتنا عليهم اسلوب في الرد مهوب صاحي تقول لة كيف يا شاطر يرد عليك بذاك الرد اللي يحوم تسبدك !! المهم نرجع للنفاسية واهلها بمجرد استقبالهم لتلفون من احد الحريم وتبلغوهم ترانا نبي نزوركم تبدا صفارات الانذار في البيت تشتغل !! النفاسية بتقعد تراكظ تلبس وتغير القميص حقها المخيس اللي لة عندها عشر سنين وما تبي تغيرة والحجة " مرتاحة فية " حشى صار بيت مهوب قميص ذا !! وتفتح شنطتها وتطلع من هاك القمصان الغاليات اللي هي شاريتهن لها السبب بس وبتسبح بزرها والله يذكر الطشت الاحمر باالخير يا ما بغيت اغرق فية مسيكين الطفل الصغير اذا بغو يسبحونة اهلة تقل يبون يعلمونة السباحة تنطلة في الطشت وتروح تكلم في التلفون وترجع والصغير يا الله يتنفس خطر ما يغرق وتكبب علية من الشامبوات والله يستر ان ما غلطت وصبت علية كلوريكس !! وتلبسة وتحط علية دهن عود !! والام طيارة على المجلس تبخرة وترقا لغرفتها فوق وتطلع علب الشوكلاتة والحلاو الفاخر ( موزيتة عن عيالها مساكين ) طيب ليش كل ذا ؟ انتن داريات وهن داريات عن المطرحة اللي في الصالة اللي كل وقتس منخبقة عليها ؟ عجبي قابليهن هناك وبس
وتعال عاد شف الشي اللي خلاص انا حامت تسبدي منة اذا شافو البزر وهو توة حواقة !! يوووة يشبة ابوة لا والله يشبة امة لالا تصدقين فية من خشمس وفية من عيون ابوة وجبهتة طالعة على جدة !! حشى خلاص ملينا من ها الاصطوانة ترا !! باتسر يبي يكبر البزر وبتشوفون اشباهه من هي رايحة علية !! صدق الفراغ مشكلة
------------------
برضو في النفاس اذا جا زوجها الصحيح يبي يزورها وش يصير ؟
خذ :
نفس اللي فوق من تزبيط وتغيير ملابس مع فارق بسيط الا وهو البنت اللي هي زوجتة تبي تسوي نفسها مرررررة تعبانة ومرهقة اي يعنني شفني تراني تعبت في الولادة علشان اجيب لك ولد او بنت حس فيني تكفى !! وبكرة راح تذلة انت ما تحس فيني ما تذكر وش كثر تعبت في الولادة علشان اجيب لك بزارينك وانت ولا داري !!
المهم دخل الصحيح وكاشخ على سنقة عشرة وفي جيبة دفتر ابو اربعين كل يوم قاطع صفحة منة زوج دلخ بريء ما يدري وش قاعد يصير من حولة خخخخخخخ
دخل على المدام وهي تبي تبتسم ابتسامة صغيرة وهو مسيكين يبي يجي فاقن كشرتة لها ( لعنبو بليسك اثقل شوي تراها جابت لك بزر حالها حال باقي الحريم )
طبعاً هي زي ما قلنا مرة تعبانة قدامة مسوية عمرها وكنها تبي تذلة بجيبتها لولدة او بنتة تقل غيرها من الحريم ما يولدن !! وامها جابت الشاهي وجلست تقهويهم وتوها صابة البيالة لبنتها عاد بنتها فزت شوي من على السرير تبي تمد يدها تاخذ البيالة وامها بسرعة البرق بتقول " هووو منتب صاحية خليس لا تتحركين ترا اللي فيس مكفيس لا تتحركين يا بعد قلبي !!" والبنت يا هي تبي تتشقق من الوناسة وكني بها تقول آآة يا حبني لتس يا يمة خلية يسمع اية وش صرنا ابد الام تثبت وبنتها تشوت ومن اللي ضايع في الطوشة با الله عليكم ؟ المسيكين اللي جنبهم زوجها يبي يصدق وبياخذ البيالة من خالتة ويعطيها زوجتة يعني نجحت الحيلة علية ونست زوجتة ان زوجها ذا المسيكين متسلف من ابوه قريشات ومارن قبل لا يجيها على سوق عتيقة وظاف لة صندوق بردقان وتفاح وموز وغيرة وغيرة من الفواكة وسير بعد على سوق الغنم ولقط لة خروف نعيمي ومر في الطريق على محل حلويات فخم وشرا لة كم كيلو حلاو وغلفهن بذيك العدة من الدراهم ومسوي فيها رجال وجايبهن معة لاهل زوجتة ولو تشوف شكلة وهو يدخل الاغراض للبيت اول ما جا ابتسامتة شاقة وجهة شق ليش يا غبي ؟ قاعد تصرف على اهل زوجتك وفرحان ؟ مالت عليك بس يا مخفة انا صادز والله دقق في وجة نسبك اذا جاب لكم ذا الخلطة وحرمتة تتنفس عندكم أل يعني ما تعرف تتنفس الا عند اهلها خخخخخ شف وجهة تلقاها في قمة وناستة وهو يشيل من شنطة سيارتة ويدخل الاغراض !! خش بعينة ولا تستحي وقلة " مبسوط على ايش يا ابو الشباب ؟" ادري ما راح يعرف يجاوب بيهز راسة ويقول مدري !!
ووش بيقعد عاد هو وزوجتة يتكلمون فية وهي على سرير النفاس ؟؟؟
انا كنت لزقة من قلب ما تولد وحدة من خواتي الا انشب في خشم نسيبي اذا جا يزور زوجتة يحاولون يصرفوني منا مناك مافية امل خخخخخخ
أل اية يعنني واحشين بعض ؟ مالت عليكم باتسر تجون لمنا وانتم متخانقين
وطلعت موضة وهي بعد ما تخلص النفاسية الاربعين اللي مدري من خلاها اربعين وليش بعد؟ تسافر هي وزوجها سياحة !!! حشى على فرض مع كل بزر بيجي بتسافرون سياحة بيروح عمركم كلها في سفر لان حنا بغير العشر بزارين في كل عائلة ما نعترف !!
-----------------
نسينا نذكر وش يصير بعد مغادرة الحريم اللي جن يزورن النفاسية
تعال شف وجة النفاسية والحريم عندها وعطتها وحدتن منهن كيسة مغلفة تلقاها تستحي وتقول هوو والله مالها داعي الكلافة ما بينا شي جيتكم اهم شي عندي ( هين بس لو بحلف نص الحريم يحملن ويولدن مهوب حب في العيال الا حبن في الهدايا اللي تجيها في النفاس !!)
المهم هذا وجهها النفاسية عند تقديم الهدية ويجي هنا دور امها اللي تلقط الكيس من يد بنتها وتلفزة منا او منا وبمجرد ان الحريم يذلفن تتغير الصورة با المرة ذاك الوجة المستحي وذاك الحسي الزين يتغير وتقوم النفاسية تنبش في الاكياس ويساعدها في هذا الشي اخواتها طبعاً ومهنا كيس ما ينفضونة يبن يعرفن وش جابت فلانة ووش جابت علانة ولا ننسى مسالة البحث عن الفلوس بين قطع الاقمشة !! هاه خمس مية ملفوزة منا والا ميتين مناك وهذا تخصص الام عاد الى هنا حلو ما قلنا لا بس الغلط يجي اللحين :
وععع وش جايبة لي ذي ؟ هذي بدلة لولدي ؟ هذا لون ؟ شكلها شاريتها من سوق الحلة هين اوريها وانا اللي شارية لها يوم تولد بدلة بذيك العدة وهذي هديتها لي وعلى كذا الباقي يستمر
بس لو الحريم يفتحون عيونهم شوي بيلاحظون ان ملابس الطفل تدور عليهن كلهن خخخخخخ والله اني صادق تلقا ذي تهدي ذي في نفاسها بدلة للبزر وما تعجبها عاد وش تسوي بها تنطلها ؟ لا توزيها عندها لين ما تولد وحدتن من جماعتها وتعطيها اياها وعلى كذا يستمر الوضع !!
-------------------
النفاس كلة غثا والله اقصد غثا على اهلها وخصوصن اخوانها ما غير ريحة البيت كلة حلبة وحلتيت وغيرة مما نصحو بة العجز !! ولا يهون المحلى على الصبح وهذا ازبط شي خخخخخ
بس فية ميزة وحدة حلوة الا وهي ان كل ما جو حريم يبون يزورون لازم لازم يجيبون معهم شي زين ينوكل
خخخخخخخخخخخخخخخخخخخخخخخخ
هذي قسم بالله ازبط شي تلقا بيتكم اربع وعشرين ساعة كيك وحلا وطرطات وحلاو ( ودي اعدد اسامي الحلاو الزين بس ما اعرف اساميهن وقتي كان حلاو بقر) ولا تهون كراتين الببسي والميرندا
انا يوم اني صغير وظيفتي معروفة اذا كان عندنا نفاسية في البيت اصير بواب !! ما يطق احد باب بيتنا الا ونتناقز انا وباقي اخواني نفتحة وشف دورة الايام يا مسلم قبل كان ابوي يلفعني ويلحقني زبيرتة علشان نفتح الباب واللحين يوم صار عندنا نفاسية نتهاوش من يفتح الباب اول والسبب معروف تبي تلقا قدامك حريم كاشخات ومعهن سلال مليانة كيك وحلا وبتلقا ولدهم اللي جايبهم شايل كرتون ببسي وكرتون ثاني مشكل !! انا كنت وبكل قلة ادب امعط السلة اللي فيها الاكل والكيك من الحرمة وانحاش للملحق اخوي الثاني مهمتة كرتون الببسي اخوي الثالث مهمتة سهلة وهي يصك الباب في وجية الحريم بعد ما ناخذ غنائمهم ( يا كنا مفشلين اهلي بقوة ) وتبدا في المحلق رحلة التخريب !! الكيك ينحاس والببسي يشرب وما يعكر علينا وناستنا الا اذا دخلت علينا امي وبيدها ملاس وكلامتها ما غيرها " حسبي الله على بليسكم ما تستحون انتم ؟ فشلتوني عند الناس ما قد شفتو خير يومكم تسون تسذا ؟ هييييييييي خربتو الكيك شلون بدخلة عليهم اللحين بعد حوستكم كيك اية يا ماما بس صار الكيك مريسة ما بين يدينا وسعابيلي علية
نجي لاكل النفاسية عاد
الاكل الخاص اللي تقل مزبطة اكبر مطعم فرنسي !!
مطازيز وفي رواية اخرا مرقوق !! تسبح في باديتة عدد كبير من الحبة السودا !! ورائحة الحلبة تفوح منة ويا انا علة كنت بعد كنت اترك غدا اهلي ذاك واجي اخاشر النفاسية في غداها اية شباب كنت اكل حلبة للاسف
--------------------
بعيداً عن النفاس :
تدرون وش يصير على البنت اذا تزاعلت مع زوجها وجلست عند اهلها ؟
تعالو شوفو :
مهنا شي يقهرها ترا الا اذا زوجها عطاها اشكل وما اتصل من باتسر يدورها ياهي تبي تولع قهر بعد خخخخخخخخخخ وهي بزعمها يوم قالت لزوجها مابيك ودني عند اهلي ان رجلها من باتسر يبي يجي يراظيها وهو عندة فرقاها يوم عيد الا بعض المستدلخين اللي ما يدرون وين ربي حاطهم فية ما يمدية ينزلها عند اهلها الا وهو مديور مرة ثانية جاي يراظيها
انا ماني ضد انك تصالحها بس مو دايم !! اذا شافتك كذا صدقني كل ما طق عود بتقول لك ودني لاهلي لانها عارفة راح تجي تراضيها لكن شوري عليك اضغط على نفسك كم يوم وان حصل اسبوعين وصدقني تبي تجي من الشغل ذاك اليوم وتلقاها في بيتك موجودة جايبها اخوها وبطلب منها

اثقل وخلك حمش !!!
الا على طاري التثيقل تذكرت سالفة مرة من المراير من زمان يعني ايام الجاهلية اسميها انا ايام المراهقة تعرفت على بنت با التلفون ( خربت الاخلاق وخرو بس ) المهم بزعمي وين تحبني خف بي واحد من الربع كنت شاد بة الظهر في ذا المواضيع قال لي اثقل عليها اذا اتصلت لا ترد !!! خلها تعيش من دونك لمدة اسبوع اذا ما تجيك تزحف عند بابك تصيح وتقول لك ارجع ارجع لي يا حبيبي ما اكون انا فلان !! انا انبسطت ولو شي رهيب
واسوي زي ما قال !!! طنااااش اول يوم ثاني يوم ما رن التلفون !! ثالث يوم برضو والرابع زية ؟
وش العلم يا ولد لا تكون ما استحملت بعدي عنها وماتت ( واثق ) وادق انا في اليوم الخامس واقول هااي اكيد وحشتك صح ؟ تبون تعرفون وش صار ؟ لازم يعني ؟ يا حبكم للاحراج هي ما تكلمت واجد بس تفلة وعقبها صكت السماعة امحق شوق ولهفة !!
-----------------
واذا كانت زعلانة مع رجلها وجالسة عند اهلها تدرون وش يغثها بعد ؟
تعالو :
اذا جو حريم يزورون اهلها وهي عندهم خخخخخخخخ
والله يا هي تتوهق مسيكينة ما تدري وش تسوي !!
والله هذا احسن شي رهييييييب مرة الموقف
ما تبي احد يدري عن مشكلتها مع زوجها طبعاً خايف من كلام الناس واخص هنا بنات خالاتها وبنات عمانها هذولي تحرص وتخاف منهن اكثر لانهن اقاربها وتلقاها عندنهن دايم تبربر زوجي يحبني وغيرة واذا درو ان رجلها ناطلها عند اهلها تبي تتغير الصورة
وش الحلول عند البنت في ها الموقف طيب ؟
حلين بس :
يا انها تتوزا في احدا الغرف فوق لين يروحون الحريم من عند اهلها
او انها تلبس لبس كشخة وتدخل على الحريم واذا سالتها بنت خالتها وش عندس جاية لاهلس تقول لها ابد جاية ازورهم شوي وزوجي يبي يجي ياخذني بعد شوي !! واستحدثت مؤخراُ تصريفة عند البنات مهيب صاحية وهي زوجي عندة انتداب في الخرخير لمدة اسبوع وقلت لة منيب رايحة معك والله مع انة يترجاني اروح معة بس عييت !! حريم وش نقول يا ربي
----------------
وفية نوعية بنات وها النوعية والله اني ابصم باالعشرين ما يدرن وش السالفة يقلدن غيرهن وبس في حكاية اذا زعلتي مع رجلس قولي لة انا بروح لاهلي مابيك وترفع السماعة على امها وتقعد تبسي وتبسي خلي اخوي يجي ياخذني انا مابي اقعد عند زوجي !! تنخرش عاد الام وترسل ولدها انت يا اخو البنت ويجي عادتن الام تختار وبعناية اي ولد من عيالها ترسلة للمهمة هذي وغالبن انها تختار ادلخ واحد من عيالها علشان ما يقعد باتسر يفضحهم عند الناس !! وما يمدية يجيب اختة لبيت اهلها وهي شايلة معها شنطة كبر راس البعير تقول خلاص ذي تبي تجلس سنة عند اهلها وها الكلام الظهر ابد ما يجي المغرب الا وهي تصيح على امها ابي ارجع لبيت زوجي !! وصياح رجعوني مابي اجلس عندكم مابي اخاف الناس يدرون عني وانفضح وتبدا الاشاعات علي زوجي ما حبني ونطلني عند اهلي !!صابتنا عين وكرهني !! ....... طيب يا بنت دامس منتب قد طلعتس من بيت رجلس وش اللي خلاس تطلعين ؟
صفقني ان كانها تدري هي ليش طلعت بس تقليد !!
وغالبن ذي النوعية تكون مدعومة من قبل صديقة عزيزة عليها شخصيتها قوية شوي ولقت ذا المخفة انتي يا البنت وتعلمها شلون تتصرف !!
---------------
قريبً من النفاس : ( افففففف )
طيب عزيزي المعرس وحرمتك قاعدة تنفس عند اهلها تدري وين تكوت زوجتك في اخر يوم من تمام اربعينها ؟
طبعاً عند الكوافير تبي ترجع على بالها يام ليلة زواجها مع مراعة انها اللحين تقدر تصبغ وتحوس الدنيا في وجهها لانها عرفت ان زوجها ما عندك احد ومستحيل يهاوشها ليش سويتي كذا بشعرس خصوصن انها توها طالعة من الاربعين وهو مسيكين حاسبها صح !!
ما قلنا شي حلو انها تتزبط لزوجها بس تعال شف شكلها بعد يومين بس من رجعتها لبيتها ؟
رجعت حليمة لعادتها القديمة
ريحة البصل ....ذاك القميص المحلي اللي ما تغيرة ....النفس الخايسة رجعت مع ملاحظة انها اللحين تبي تصجك بنت او ولدك ذا غثني افف معد اقدر الحق اسوي شي في البيت !!!!
لا تقعد تهز راسك انت وياة تأمل في اخر جملة تو !!
تبي تقول لك " معد اقدر الحق اسوي شي في البيت "
وش معناة ذا ؟ اية اية تبيك تجيب لها شغالة
وانت كني ادري فيك بتصدقها تبي تقول لك يا بعد عمري شف وش صارت حالتي !! ها البزر من جهه وانتي طلباتك من جهة وشغل البيت من جهة والطبخ من جهة وشغلي من جهة !! كيف الحق انا بشر يا حبيبي !! وش بيظر يعني لو جبنا شغالة ؟ على الاقل تظف عني البزر شوي !! وتنظف البيت !! وان حصل تطبخ مهنا مانع !! وانا يا بعد عمري بصير فاضية لك ليل نهار وانت يا الرجال ادري كلمتها الاخيرة ذي تبي تخليك توافق تبي تصدق انها راح تصير لك ليل نهار مسكين ارحمك وربي والصدز هو انها تبي تعطيك اشكل يا حبيبي سواءً جبت شغالة والا عشر ما من فرق ترا !! اللي تبي تشيلك على راسها تبي تشيلك لو عندها عشر بزارين خل عنك بس
حط في ديمجتك اي بالك ان زوجتك متوقعة انك اذا جيت واخذتها من عند اهلها في تمام الاربعين انك مزبط الشمع والورد في البيت حقكم وطالب اكل من مطعم فخم ( انسى الشاورما ذيك الليلة ) وانواع الرونسية والكلام الزين المزبوط تبي تقولة انت لها وش نسوي بنات يقولن حنا رومنسيات والله اعلم !!
------------
جابت البنت بزر طيب وهي مدرسة من يبي يجلس عند البزر اذا الرجال طلع حمش وما جاب لها شغالة ؟
اية اية امها المسيكينة
تعال شفهم على الصبح وقت المدارس يا حول
تطلع من بيتها وشايلة بزرها على كتفها وعلى طول على بيت اهلها يوقفون وبكل بجاحة وقلة ادب تنزل هي تطق الباب على امها ومن تالي صارو يدقون با الجوال بعد متعيجزة تنتظر عند الباب ما اقول الا جعل رجليس للكسار بس !! وتجي امها يا حول عجيز هادن حيلة المرض وتنطل بزرها عليها وتروح وتصير امها صاحية كل الوقت مع ولد بنتها
ما بيت تغير حفايضة وتلعيبة وتزبيط رضاعتة
لعنبو حيكم والله عيب عليكم !! منتب قد العرس لا تعرسون امك فاضية لس هي ؟ مو كفاية تعبت في تربيتس انتي وشلقة اخواتس وكل وحدة جاية على الصبح تحط بزرها عندها ؟ بدل ما تريحونها تالي عمرها جايين تغثونها والا الخافي اعظم يا جماعة الام من عز الظهر جالسة تطبخ الغداء وودك تجي للمطبخ وتشوف بعينك بس !! انواع حافظات الطعام مجهزة هذي لبنتها فلانة وهذي لبنتها علانة وغيرها وغيرها لاعبات على امهن يقولون لها ما يمدينا يا يمة نطبخ اذا رجعنا من الشغل !! ازواجنا يبون غداهم زاهب وما يحبون ياكلون من المطعم !! وش بيضرس يا يمة لو تزودين حبتين رز ودجاجة على الغداء لنا وحنا جايين ناخذ عيالنا ناخذ غدانا منس بعد لا عادها الله من شغل ولا عادها الله من دراهم تبين تاخذينها من وظيفتس
-----------------
عزيزي المتزوج خلك واثق مهما كانت زوجتك تكرهك ما راح تقول لباقي البنات !! الا شلة قليلة بس وغالبن ما يكونن صديقاتها من ايام الثانوي !!
والا عند باقي البنات صدقني ما راح تسبك ابد
راح تقول لهن والله زوجي فلان وش حبي لة حنون ويخاف علي وما يرفض لي طلب ابد كل يوم موديني لسوق وكل يوم معشيني في مطعم وكل يوم داخل علي بهدية وانت ووجهك ما عمرك دخلت عليها بغير سرة كراث !!
بس هي ما تبي تقول للبنات انة ما يحبني !! ماتبي تقول للبنات انك منتب رومنسي !! ما تبي تقول للبنات انك ما تصبحها وتمسيها على كلام الحب !! غيرة بنات اللة يكفيك الشر وحب ترزز وكشخة !!طبعاُ وش زود فلانة زوجها يحبها ويدلعها وتقول لنا وانا اجي اقول لها ان زوجي ما يحبني ؟ لا الا بقول زيها واكثر بعد ولو تسوي بحث وتحري عن صديقتها اللي تقول لزوجتك ان زوجها يحبها ويدلعها وش بتلقى عيشتها ؟ انا اقول يصبحها على طراق ويمسيها بلزخة عقال بس ذيك ما تبي تقول للبنات بعد تسذا !!! شفت كلهن ينصبن على بعض
ليش ما يتصارحن طيب اصرف ؟
بس تعال هنا مهوب ترتاح وتقول ان زوجتي ما راح تسبني عند احد ابد ؟
لالالا يا حبيبي حط في بالك ان جلدك يبي يتقطع من الحش ما بين لسان حرمتك واعز صديقها عندها الله يا هن يبن يحشنك حش مهوب صاحي وبتكمل بعد اذا صارت صديقتها ذي معرسة !!! الله الله تبي تبدا المقارنة بينك وبين زوج صديقتها خخخخخخ كل وحدة تبي تطلع عيوب زوجها ويبدون يقارنون بينكم وانت ياغافل لك الله تدربي كرشتك في سوق الخظرة تتقضى
----------------
نجي لعاد لموضوع ثاني الا وهو سواليفهن بعد ما يجن من العروس
هذي بلحالها مستعد أألف عنها كتاب كامل
بس من يوم اني صغير يعني اول ما بديت اسوق وانا متأقلم مع الوضع صح وكنت فاهم الموضوع صح
ما كنت اودي اهلي للعرس لا اخلي اخوي يوديهم وانا اللي اجيبهم خخخخخخخخخخخخ
ولي غرض طبعا من الحركة ذي !!
الاول هو انها فرصة تقز البنات لا جيت تنادي اهلك ووقفت عند البوابة تحتريهم ابن امة يقول لك وش قاعد تناظر انت ؟ ردك بيكون ان حصل وسالت هو " والله اشوف وادور اهلي يمكن انهم يطلعون وما ينتبهون لي " خخخخخخخ
ويجي هنا عاد دور لكاعة " بعض " البنات وهن طالعات من بوابة العرس وهي يا انها تطلع وتوها ما لبست الشيلة يعنني مستعجلة وخرو بس والا تلقا لك وحدتن تترزز عند الباب كل شوي يعنني ادور على اخوي او ابوي تاخر ما نادانا والشي الاكثر عاد وناسة اذا جن يركبن السيارة تعال طالع بس طبيعي الفساتين مخصرة !! وبعضهن مشققة اقصد فيهن فتحات !! وياربي بس يعني ما تدرن انكن اذا جيتن تركبن يبي يطلع ساقس ؟ وانتن يا اللي تلبسن مشقق ما تدرين انة بسبة فتحتس ذي يبي يطلع نص فخذس ؟ طيب تدرين ليش ما تراعين مشاعر الشباب العزابية اللي يحترون اهلهم زيي
وش ذنب الشاب العزوبي اللي وبدون قصد راح يقز ما طلع منس ( هين بدون قصد بس ) ؟ بيروح لبيتهم وهو مهموم يا عزتالي لا يجي ببالس انة يمكن يخطبس علشانة شاف ساقس اذا كان هذا تفكيرس !! انسي بس اصرف
لا تقولين من دون قصد وتحلفين هين بس علينا عاد ؟
السبب الثاني هو :
ابد بمجرد ما ان ينصك اخر باب في السيارة معطينك الاشارة بذلك با التوجة للبيت بعد سهرة عرس مرهقة وتبدا مرحلة السب والحش
شفتي فلانة وش هي لابسة ؟ الحمد لله بس والله انها فصخت العقل مرة !! كل ظهرها طالع !! والا ذيك بعد مدري شلون رجلها طاوعها وخلاها تقص شعرها قصة ولد !! وترد عليها الثانية معقبة اي رجل يا حسرة بس !! وهي رجلها رجل عاد !!ممشيتة كنة غنمة معها وانا بكل لعانة ساكت اسوق بس مخليهم على راحتهم مبسوط على حتسيهم ويبدا الحش في العروس اذا كانو هم من اهل المعرس !!
واللة مدري وش هم لاقين فيها يومهم يزوجنها لولدهم ( وانتم وش دخلكم طيب ؟) وععع هذي اللي يقولون انها حلوة وزينة والله ما شافت الزينة عادية ( ولاحظو لفظ عادية ذا تراة دايم يجي في ها السياق من الحتسي )
وازبط شي عاد اذا وصلو للبيت وصار في البيت بنت او ثنتين ما راحن للعرس تبدا مرحلة ثانية من الحش يبدون اللي راحن يقصن للي ما راحن عن العرس ومن جا ووش لبست فلانة وعلانة وفي حكاية اللبس عاد تعال اسمع بس فلانة مار معد تستحي مرة تصدقين لين اللحين تلبس فستان حوالتها ؟ ما غيرتة والا علانة لابستن لس ذاك الفستان اللي لعب في الشك والتطريز حقة خياطها والله انها خربها عليها ( وش دخلكم طيب هي راضية يا ناس !!)
-----------------
نجي عاد للي يصير داخل قاعة العرس وبخصص الحتسي عن البنات اللي ما تزوجن
كاشخات ومتزينات وكل ثلاث او اربع مع بعض يعنني شلتي !! يرقصن مع بعض والله من زين الرقص يا واقفة في محلها والا تدور على الحلبة تقل ضايع لها شي !! وترا القصد من رقصهن مهوب الرقص لا والف لا القصد واضح للي يبي يعرفها وهو تبي الحريم والعجز خصوصن يشوفنها كود وحدتن منهن تخطبها لولدها خخخخخخخخخخخخ وفي حلبة الرقص عاد تبرز وتشد الانظار اللي شعرها طويل لان العجز لين اللحين يبون البنات اللي شعرهن طويل ويحبونهن !! شكلي قديم صح شكل حتى تفكير العجز تغير !
وبمجرد نزول البنت من حلبة الرقص تبدا مرحلة الترقيم !!!!!!!!!1
لا يروح بالكم بعيد اصبرو !! اقصد يجون بعض العجز يحتسون معهن من انتب بنتة ؟ ووين تدرسين ؟ مخطوبة انتي ؟ وتلقا باقي شلتها انتي يا البنت يضحكن على صديقتهم وكل وحدة منهن تقول يا الله من قدها ظمنت لها عريس !! وتبدا العجوز عاد تحتسي على البنت اللي عجبتها عن ولدها زين الحلاي ( الله من المصالة فية ) وولدي زين وموظف وشبابة زين ما شاالله علية ويبي يعرس اها وش رايس ؟ ما فية بجاحة من قلب والبنت قال ايش يعنني تستحي بترد وتقول مدري والله يا خالة شوفي امي هناك كلميها
هذا غير الطقاقات ابشركم صارن يشتغلن خطابات اوفر تايم ماهن بسهلات تلقاها تلاحق البنات الزيون عطيني رقمس !! انا خطابة وعندي لس عريس وبعطي رقمس لامة تتصل على امس
ومن باتسر عاد على الظهر يبدا التلفون حق بيت البنت ما يسكت اذا كانت هي زينة هذي ام فلان وذيك ام علان وكلهن يبن يخطبن البنت لعيالهن !!
وبلا شك هذا شي يبي يرضي غرور البنت يا هي تبي تتشقق بعد وبتروح تقص لصديقاتها اللي كانن معها في العرس امس عن التلفونات اللي جتهم يبون يخطبونها ^_*
------------------
بعض الرجاجيل من تصيح زوجتة قدامة وتطلع من عيونها دمعتين بس يروح في خرايطها يصدق المسيكين انها انجرحت و زعلت وخصوصن اذا هي طلبت منة شي وعيا !! وش تبي تسوي هي بزعمك يعني ؟ بتصفقك كف ؟ ( والله بعضهن يروعن جايز يسونها) اكيد تبي تمثل قدامك وتبتسي عندك وتنزل كم دمعة والحرمة عاد دموعها ما تبي شي !! تتحكم فيهن زي سلام عليكم انزلي يا دموعي تنزل !! وقفي يا دموعي توقف !! ما فية اماهم يسمون دموع الحرمة دموع التماسيح فيعني لا تصدق يا حبيبي واكبر دليل انها اول ما تصيح وتنزل لك ها الدمعتين وتتعبر تسويها قدامك يعنني توريك شف وش انت سويت فيني يا خشن !! يا متوحش !! يا شبية الضب !! يا جارح احساسي !! ثمن تركظ لغرفتها طيب ليش ؟ لو فرضنا انها تروح لغرفتها يعني حفظن لكرامتها ما تبي تصيح عندك ليش توريك من البداية ؟ فكر شوي وتعرف
ترا الدمعتين اللي ورتك اياهن وراحت تركظ هي السنارة اللي تبي تصيد فيها السمكة !!
قصدت في السمكة انت يا تمساح قال سمكة قال مالت بس
--------------------
اخي العزيز المقلع المتزوج او يا من مقبل على العرس شف ترا حرمتك تبي تقول لك اني اغار عليك موت لازم تتحمل غيرتي عليك !!
انت كأي تمساح فاقد حنان معرس علشان تشوف بعيونك ها الحنان اللي صجوك فية في المسلسلات والافلام بين المعرسين !! تبي تصدق كلامها ادري
تبي تنبسط اكيد ولو بتقول يا الله زوجتي تغار علي ما تبي باقي الحريم يشوفوني !!
طيب يا حبيبي نحسبها شوي ونشوف :
متى زوجتك تقول لك ذا الكلام ؟
تلقاها ما تقول ذا الكلام الا اذا طلعتو للبر وبقول البر اللحين كمثال بسيط تلقاها بتقول لك قبل لا تجي من عند الحريم تكفى ما بيهن يشوفونك انا اغار عليك !! ولا تسقط على سيارات جماعتنا اللي يبي يطلعون معنا وحنا في الطريق اخاف وحدة من بنات خالاتي او قريباتي تشوفك ويمكن تعشقك !
وكني اشوفك متشقق من الوناسة وعلى بالك تبي ترفع ظغط زوجتك بتقول لها " الا بمر من عندكم وانتن مجتمعات موتي غيرة " وهي بترد عليك لا لا انت تبيني اموت حرام عليك وانت خلاص تحس انك ملكت الدنيا اللحين بغيرتها عليك
اسمح لي ابين لك شب خافي عنك ويبي يصدمك وجايز من قوة الصدمة ينعفط وجهك الا وهو :
هي ما تغار عليك حبيبي !!
وش تغار عليك فية يعني ؟ جمالك يا حسرة ؟ وسامتك يا توم كروز ؟ طولك يا حسرة انت واخوانك لو توقفون على بعض ما جيتو مترين !! كتوفك يا خلاف تقل خيمة بلا عواميد !! خشمك اللي كنة كعكات قراندي 88 ؟ قلي وش فيك زين علشان تغار عليك ؟ لا تزعل خلنا واقعيين كلنا شيون عادي فضفض
بتقول ليش هي تقو لي ذا الكلام طيب صح ؟
اقولك : هي تقول لك لا تمر من عند الحريم وما تبيهن يشفونك من الشين اللي فيك ما تبي البنات يضحكون عليها اذا شافوك بيقولن هوو هذا رجلها اللي صاجتنا فية ؟ وععع لو انها جالسة عند اهلها وما اعرست ازين لها
هذا الحقيقة وبكيفك عاد صدقت والا لا
------------------
طلعت موضة جديدة من تالي للي يبي يعرس وهي يقول لك ابي اكلم البنت قبل لا اتملك !! قال ايش ابي اشوف افكارها زي افكاري والا لا ؟
اي افكار يا خوي ؟ قلي بس ؟ وش في راسك يعني غير البلوت وكبسة الرز ولعب الطائرة في رمضان وتقليب قنوات الدش ؟ هذي افكار اللحين ؟
مو هذا الموضوع المهم بيكلمها وربعنا وين يبي يروحون يعني اكيد مع الصوت يبي يخق وتبدا في اول مكالمة انواع التميلح من عند التمساح الكريم وهي بنت تعرف شلون تلعب لعبتها صح ياهي بترقص بك ترقيص يا مسكين شف قاعدة بتلقاك انت متخيل انكم بتسولفون وتحتسون حتسين مهوب صاحي يتخللة كلام حب وان حصل قصيد لكن الواقع ما راح تستفيد شي ابد وخذها مني !! كنك قاعد تكلم نفسك تبي تجتهد وتسولف لها ذيك السالفة اللي وش طولها وهي كلها نصب في نصب ولو حنا شباب وفاهمين بعض والتالية اذا خلصت انت تتوقع انها بترد عليك رد طويل وتقعد هي تتكلم بس اللي يبي يحصل بترد هي بكلمة وحدة او كلمتين وعادتن هن : لا حلو !!!
شفت ؟ وش استفدت انت عاد ؟ ابي افهم كيف راح تتبادلون الافكار يعني من خلال ها المكالمة ؟
هي بتنصب الله لا يعوق بشر اسواق اعوذ بالله تبي تقول لك ما احب اروح لها ونادر ما اروح واكثر ثيابي اوصي امي او احد خواتي تشتريهن لي !!
عزايم اففف يا انا امل وما اطيق اروح لهن الا اذا حلفت علي امي ( وهي عبايتها ما تنزل من على كتوفها )
تلفون هذا الشي اللي مستحيل استخدمة الا للضرورة وتراني والله اكلمك اللحين مغصوبة مو كرهن فيك لكن ماش ماني متعود اتكلم كثير في التلفون !!
طبخ شف عاد المطبخ هو المكان الوحيد اللي القا فية نفسي وتطلع مواهبي فية ( يا نصبي ) اخواني يترجوني دايم اني اسوي لهم حلا وطبخات شامية وغيرة تصدق واحد من اخواني قام يصيح يوم عرف اني انخطبت لك تدري لية ؟ يقول من بيدلي ييزبط لنا طبخات واكلات زيس هذا غير الحلا ( يمدحون قلاية البيض ها اليومين )
دش واغاني اعوذ بالله يا خي وش ذا الكلام الله يهديك بس ؟ صدقني اني كنت من المعارضين لدخول الدش في بيتنا والى اللحين ( وتلقاها هي اللي كانت تزن على راس ابوها انة يدخلة ) والاغاني دايم دايم اذا ركبت مع اخوي اذا جا يوديني للجامعة نتخانق هو يبي يسمع اغاني في السيارة وانا معة وانا اعيي ( وهم يتهاوشون هو يبي يشغل خالد عبدالرحمن وهي تبي تسمع لراشد الماجد )
قلي بس وش تبي تاخذ منها علمن وكاد ؟
وانت يا التمساح تلقاك تقرا وفاقن خشتك وناسة تراك اردا منها في النصب اها بس علي عاد ؟
تبي تقول لها المسيكينة :
سهر ؟ اي سهر الله يحيس بس اصلي العشاء وامر المخبز التميس وعقبة الفوال وارجع للبيت واتعشاء مع اهلي ( وانت ما ترجع الا بعد صلاة الفجر وزين ان صليتها مع الجماعة )
مغازل ؟ كبيرة هذي شوفي مو معناها اني طلبت اكلمس يعني اني متعود !! صدقيني قاعد اكلمس ويدي ترتجف وش اسوي مو متعود اكلم بنت في التلفون غير اخواتي ( وانت نوتت الارقام في جيبك مليانة ارقام بنات غير التميلح اللي تسوية اذا ردت على تلفون بيتكم وصارت صديقة اختك وتبيها ومنها ما يلي " من يبيها ؟ انتي نورة بنت خالتي اوة اسف ووالله صوتك يشبها لان صوتها هي حلو زيك !!" )
سفريات ؟ يا حسرة بس ابعد ما رحت الشرقية ومع الاهل بعد ( وانت جوازك مليان ختوم مصر مرورً على المغرب وان كان معك لغة ما يحدك الا بلغاريا وادري بتسوي زي غيرك اذا جيت تعرس جددت جوازك علشان تروح الختوم اللي علية )
اقدر الحياة الزوجية ؟ طبعاً اقدرها ( اقطع رجلي من لغاليغها اذا تدري وش معنى ذا الكلمة وشرحك سرا علشان ما تزعل )
طبعاً اقدرها واعزها واكن لها فائق الاحترام !!
شوفي اهم شي التفاهم بينا ( امحق تفاهم هي كلمة عجزنا نغيرها وهي " مزاجي انا حر " او " مزاجي انا حرة " كيف راح نتفاهم طيب ؟)
واهم شي اننا دايم نكون صريحين مع بعض وما نوزي عن بعض اي شي مهما كان حتى لو احد فينا غلط بحق الثاني على الاقل الواحد مننا يدري من الثاني احسن من انة يدري من برا ( وانت كلك على بعضك غامض تقل غدير كل شي عندك شخصي وين رايح" لشغل!!" من وين جاي من "شغل !!" من تعشيت معة مع
" شباب !!" من بتسافر معة "شباب !! ؟؟؟" طيب لية تبي تروح تشيش مع ربعك قلها !! تبي تسهر في استراحة شباب قلها مع مين !! تبي تسافر تصيع وتدشر قلها والشكوى على الله )
الصلاة في المسجد ؟ اكيد ولو ترا الدنيا بخير لين اللحين وفية ناس صالحين وانا واحد منهم تصدقين احيانن انا اللي أأذن في المسجد اللي جنب بيتنا ؟ اجي بدري زي العادة ويتأخر المأذن واقوم أأذن بدالة ( وانت يوم تصلي فية وعشرة في محلق بيتكم )
طيب دامك عارف ان هذا اللي يبي يصر وشلوة تكلمها ياخي ؟ مصيركم تعيشون مع بعض وخششكم مقابلة بعض وتنكشفون
---------------------
نجي عاد لشهر العسل ياهو عسل بعد
بحتسي عن الناس اللي مصطلحهم مد شعرك على قد مشطك يعني وين بيروحون ؟ جدة اكيد !! أل اية يبي يجلس معها على الشاطي في اخر الليل !!
تعال وشف وشو شهر العسل خخخخخخخخخخخخ
تبي تعرف وشو شهر العسل عندنا رح لجدة في الصيف وبا التحديد على الشاطي آخر الليل حزة العشاء وتمش على الشاطي على رجليك وشف اي رجال جالس كاشخ ومعة بنت كاشخة وساكتة والرجال يرجم حصى في البحر اعرف انهم في شهر عسل مهنا حتسي يا حيي ابد !! هي متكومة على روحها تقل مقروصة وهو يرجم حصى ومصبط !! تقل خلص الكلام اللي في ها الدنيا مرتن وحدة ؟ وشولة رايحين شهلر عسل طيب ؟ انثبرو في شقتكم وبس !! والدليل على كلامي لاحظو اول الناس يسافرون عشرين ثمنطعش يوم شهر عسل لكن اللحين اسبوع وبعضهم خمس ايام ويرجعون من شهر العسل والعذر والم الجو حر كان !!!
لحد يقول وش تبيهم يقولون ويحتسون !! اسمة شهر عسل وانا والله انصح اللي الله مقدرة ومعطية يقص لة تذركتين لديرتن سنعة لة ولها اصرف !!
اصرف من ايش ؟ بينة من عيون العالم اللي عندنا وانا اولهم رح ووسع صدرك اذا قضى كلامكم تبي تلقون شي تناظرونة يا معالم او بحيرات وطبيعة وعلى طاري الطبيعة والبحيرات وش اخبار بحيرة الحاير بس لين اللحين الفلبينين يصيدون سمك هناك مصدقين اعمارهم
هذي هي اسرارالحريم من خلف الكواليس يا من تجهلها !!
من طأطأ الى سلام عليكم
وما كتبت الا شي شفتة بعيني وسمعتة بأذني واللي بيقول اني ابالغ ما عندة سالفة !!
يا الله عقبال ما يجي نفاسي انا بعد
<---- الله من شين النفس في نفاسة بعد !
<<< يا هو يبي يتسدح صح بعد خخخخخخخخخ
عجلو علي با الهدايا والطلاعة بس !!
ادري ما وراكم الا حلاو بقر
خخخخخخخخخخخخخخخخخخخ

------------------
مسكين الرجل ... إنه يقف حائر بين أن يتزوج أو أن يبقى عازباَ و هو في الحالتين نادم ( سقراط )

ههههههههههههههههههههاااي

اتمنى يعجبكم يالغاليــــــــــن مابي احد يزعل 000

سوآلف الحريم!! 915550