عندي نصيـــحة عن الدنيا منسقها = من كثر ما شفت منها صرت مبـــغاها
والـلـــه لا ونها زوجه لاطـــــلقها = وارفع على هيئــــــة التمييز دعواها
لعلهاتنكشف باقي حقــــــــــــايقها = نصيحتي للبـــــــيب يقصــب ارشاها
ان اقبلت شفتها بيض عواتــــــقها = اقول هذي الهنــــــــوف اللي اتمناها
وان ادبرت قلت يالله لاتوفــــــقها = وش قومها تبترم وتهز رجــــــــلاها
ماشيب اهل العــــقول الاتملقـــها = من قال يازينها ياكـــــــــــبر بلـــواها
تقول قدام وتحــــفر خــــــــنادقها = وتتل عطر الشوارب في هــــــباياها
لا تبتئس كل ماحـــطت عــوايقها = ولا تنبسط كل مايضحك محيـــــاها
دنياك لوكان تضحـــك لا تصدقها = ترى خطرها يلا بانت ثنــــــــــاياها
واعلم مئه في المئــه انك مفـارقها = ويلحقك منها سؤلاً بعـــــــــد فرقاها
اموالك اللي تجمــعها وتنفقـــــــها = واوقاتك اللي تضيعها وتســـــــعاها
واحلامك اللي من الــدنيا تحققــها = تكتب وتحفظ ويوم البعث تلــــــقاها
والفاظك اللي تفيضــها وتنطــقـها = والله ماتنمحي لوكان تنـــــــــــساها
فاءن كنت في حبها هايم وعاشقها = فانظر لعشاقها قدام وش جـــــــــاها
هي فتنةِ ربنا للناس خالــــــــــقها = والرابح اللي بتقـوى الله تـــــــولاها
يالله يخالق العـــــــــــالم ورازقها = واجالها في كتـابٍ قبل تبــــــــــراها
رقابنا من لهيب النار تعــــــــتقها = واعراضنا من شمات الناس تحماها
واعداد ماهلت المزنه وبارقــــــها = صلاة ربيٍ وتسليـمٍه على طــــــــه
موضوع: عندي نصيحه... 
الخميس أكتوبر 18, 2012 10:41 pm
