محمد بن مهلهل الشعلان ..
ذبح واحد من جماعته وجلا عن ربعه ..
وبعد انتهاء المدة - او بعد ان سامحه اهل الدم - رجع لربعه وجماعته بعد قضاء سنين جلاوي عن احدى القبايل ..
المهم اول ماوصل ديرة ربعه شاف ناس متجمعين واصواتهم عالية وراح يشوف وش عندهم ..
اول ماوصل الا رجالين واحد طارد وواحد مطرود ..
المطرود دخل بوجه ابن مهلهل ..
والطارد ناصيه يبي يذبحه وهو ورى ابن مهلهل ..
ابن مهلهل حاول يمنعه من انه يوصل لدخيله ، ولكن يوم شاف مافيه فايده قام وقتل الطارد ..
وبعدها رجع من المكان الي جاء منه ولاوصل ربعه وجماعته ..
وقال ..
يامل قلب ٍ كل هم ٍ يمسه............مسة حبال مهاوزات الأظله
ول ياعجوزٍ كل حين ٍ تعسه............حتى سفيه العرب جايز ٍ له
طس السبيل من اشقر التتن طسّه............الشاوري يجلي عن القلب عله
من كيس قرمٍ دايم ٍ مايدسه............تلقاه مقروط ٍ على جال دله
لاشفت ظول الناس بالك تعسه............وان جنبك شر المخاليق خله
لو عندنا من غيب الايام رسه............الآدمي مصلوح نفسه يدله
يالله ياللي كل صوتٍ تحسه............عقد البلش غير انت محدٍ يحله
تفرج لمن مثلي زمانه يرسه............عليه من بعض المعاني ممله
عليه من بعض المعاني محسه............ساعة خرج من علة ٍ جاه عله
البوم يفرس والفهد صار بسه............تبدلت دنياك يافطن ٍ له
سبع الخلا كيف الضواين تنسه............والصلح من راع الغنم ماحصل له
القبس يورد والظوامي تلسه............والمزن عطشان والوطى مايبله
لاصار عن حقك سلاحك تدسه............ماينقعد لك في حضون المذله
موضوع: قصه وقصيدهـ ... 
السبت نوفمبر 03, 2012 6:44 pm
